Kreple na tusty sztwortek

Dzisiej momy tusty sztwortek, bez to ciepna tukyj recept na kreple, niy takie tradycyjne, nale angielskie.
Recept jes ze kanału Good Cake i jes absolutnie wyśmienity, kiej wszyjsko, co złonaczy Bella.

Trzeja trocha czasu, co by nom ciasto urosło, ale potym smak tych krepli Wom to zrekompensuje.
Polecom!

Pistacjowo torta

T. mioł geburstag. Fajrowali my ze dwa tydnie, bo trzeja było połodprowioć dlo wszyjskich.
Była tyż przyleżytość, co by sie w końcu nasi rodzice trefili.
No a że był geburstag, to mogła żech pofolgować i upiyc torta. Recept znolozł sie som, bo kupuja wszyjskie kulinarne zajtungi (no prawie wszyjskie), kiere som na rynku, no i idzie trefić czasym coś fajnygo.

W listopadowym numerze "Moje gotowanie" były recepty na ciasta łorzechowe. Toć recept na zielono torta pistacjowo mie ujoł najbarzij, czekała żech ino na jako przyleżytość, co by sie móc go upiyc.

W końcu trefił sie geburstag T. i delikatnie żech zasugerowała, czy by nie chcioł takiyj torty.
Na szczyńście powiedzioł "ja" :)
Na co dziyń nie robia tortów, bo som trocha drogie, nale terozki żech mioła fajny powód, to żech mogła go złonacyć. Z drugiyj strony trocha było tyż ślimtanio skuli tygo torta, ale o tym za chwila.

Najprzód trzeja upiyc biszkopt:

- 8 jajec
- 100 g cukru
- szolka mołki

Biołka fyrlomy i przydawomy cuker. Przydowomy żółtka i delikatnie fyrlomy. To samo robiemy z mołkom.
Przelewomy do formy i pieczemy kole 40 minut we 180 stopniach. Nado sie patyczek, co by sprowdzić, czy biszkopt sie nom upiekł.
Kiej biszkpot bydzie już łostudzony, trzeja go przekroć na 4 tajle. 


 Szpajza / krem

- 6 żółtek
- 200 g cukru pudru
- kopiasto łyżka mołki
- szolka mlyka
- laska wanilii
- 100 g masła
- 200 g mascarpone
- 200 g pistacji, łobranych

Nojprzód robiemy kryma angielsko. Żółtka ucieromy z 7 łyżkami cukru pudru bez 10 min, dosuwomy mołka i ucieromy kolyjne 10 min. 
Mlyko warzymy z laskom wanilii i po tym, jak nom sie mlyko uwarzy zalewomy nim masa jajeczno. Kiej sie nom szpajza podniesie, fyrlomy na łogniu aż nom zgynstniyje. Potym studzemy.

Zdo sie, ze jest to fest komplikowane. No i trocha jes, u nos - jak my to robili, to najprzód nom masa wylondowała na wszyjskim, co było we kuchnie, potym nom furgały gorczki z dziesiontygo piyntra, mieli my tyż chwile szlochanio, ale tyż była kupa śmiechu skuli tygo pieczenio :)

Masło ubijomy z pozostałym cukrym bez 5 minut, przydowamy szpajza angielsko, mascarpone i pomlyte pistacje. Całość chwila fyrlomy.

No i mogymy przystompić do finału.
Bieremy pierwszo tajla biszkoptu, polewomy alkoholem (jo żech przydała za dużo szpirytusu i sie ze mnie śmioli, że torta jest szpirytusowo, a niy pistacjowo; bez tóż polecom polonie torta np. cointreu abo inkszym likierym), dowomy szpajza i nastympny spód biszkoptu i tak aż do samygo końca. Kiej już bydom wszyjskie tajle narychotwane, łostatkiym szpajzy złonacymy cołko torta i łozdobiemy pistacjami.

Torta wkładomy do kilszranku, co by sie "przegryzła".
Bydzie dobro nastympnygo dnia.
Smacznego!

Szekulada ze ćwikłom abo ciasto czekoladowo-buraczane

Terozki jest fest modne co by warzyć. A jak warzyć, to ino maszkety :)
Trefili sie my wczorej wieczór u Karlosa, kaj my sie raczyli ćwiklanymi szpecjałami.
Taki my sie złonacyli tymat wieczerzy! 

Kożdy mioł cosik złonaczyć abo wspierać mentalnie tych, kierzy łonacyli.

I tak w menu było:
- ćwiklanne ślydzie / śledzie w buraczkach
- bagety + tapenady + pate z wontróbek
- kwaśnica
- dziko świnia + ćwikły
- ciasto francuskie + ćwiykły +  kozio kyjza

Musiało sie na stole znolyźć tyż coś słodkiygo. No to żech upiykła ciasto ze ćwikłom i szekuladom.
Ciasto jes ekstremalnie szekuladowe. Dyć dowo sie do niygo 3 tabliczki szekulady! :)  

Co by sie upiyc ciasto szekuladowe ze ćwikłom musisz sie najprzód naszykować:

200 g gorzkij szekulady / gorzkiej czekolady

2 jajca / jajka

150 g cukru

75 ml łolyju słonycznikowygo

80 g mołki/ mąki

1/4 łyżeczki sody

1/4 łyżeczki bakpulwru / proszku do pieczenia

35 g mandli, przemlytych / mielonych migdalów

1 łyżeczka ykstraktu waniliowego

200 g surowyj, startyj ćwikły

Szekulada musisz rozpuścić w kompieli wodnyj. Wstowiosz mały gorczek do wiynkszygo z wrzontkiym i podgrzewosz, kiej sie szekulada niy rozpuści. Potym to studzisz.

Jajca fyrlosz z cukrym. Nojlypiyj w mikserze, bo łon Ci to fajnie wyłonacy.
Jak już to bydzie mioło jasno, puszysto barwa, to przydej tam łolyju ze ykstraktym i jeszcze trocha połonac.

Wszyjstkie sypkie skłodniki przesuj do miski i delikatnie wyfyryrlej, nale już bez miksera.

Na som koniec przydej potarte ćwikły, nale wcześniyj odciśnij sok, no i nasza łostudzono szekulada. 
Fyrlej, ale ino do czasu jak sie nom skłodniki połonczom. 

Przelyj do formy i wsadź do bratruły na 180 stopni. Piecz kole godziny. Sprowdź se pod koniyc pieczenio patyczkiym, eli mosz to już fertig.
Kiej bydzie suchy, to możesz wyciongać. 

Kiej sie ciasto przestudzisz, polyj je polywom.

Jak sie narychtować polywa?

- 100 g szekulady
- 150 ml śmietony 30%
- łyżka masła

Śmietona podgrzewomy, wciepujemy tam szekulada i ynergicznie pofyrlej, co by sie szulada rozpuściła. Przydej masło. 
Polyj ciasto.

Terozki ino musisz czekać, co by sie trocha ustoło :) Smacznego! :)

My sie wczoraj pojedli, trocha my popili. Łogólnie konkluzja była, co my sie trocha zestarzeli, bo wożniyjsze było dlo nos co bydymy jeść a niy, co bydymy pić. Nale ja, przeca jodło jes nojważniyjsze w życiu, a niy to, co by nos nastympnygo dnia bolała gowa. Co niy?


 Przepis ze tyj strony.